Heidi Klum mbyll sfilatën si një nuse boho: një kapitull i ri në pistën e modës
Heidi Klum i riktheu shkëlqimin pistës pariziene, duke e mbyllur me stil sfilatën e Vivienne Westwood për sezonin pranverë/verë 2026. Supermodelja gjermane, 51 vjeçe, shkëlqeu në Javën e Modës në Paris me një pamje që ndërthurte estetikën “boho” me elegancën e rafinuar.
E njohur për paraqitjet e saj të fuqishme në industrinë e modës, Klum u shfaq me një fustan artizanal, të punuar me dorë, me një korse të bardhë me shkëlqim dhe fund asimetrik, një veshje që mishëronte shpirtin rebel dhe romantik të stilit Westwood. Pamjen e plotësoi me taka ngjyrë kafe, grim ndriçues dhe flokë të valëzuar lehtësisht.
Muzika tradicionale austriake e grupit Zillertaler Schürzenjäger krijoi sfondin perfekt për këtë moment, ndërsa dizajneri Andreas Kronthaler, bashkëshorti i Vivienne Westwood, i dhuroi Klumit një buqetë lulesh në shenjë falënderimi, duke e kthyer sfilatën në një moment emocional.
Vetëm pak ditë më parë, Klum sfiloi për L’Oréal Paris, përkrah emrave si Kendall Jenner, Jane Fonda dhe Eva Longoria. Por për mbylljen e koleksionit Westwood, ajo u veçua mes ikonave të modës.
Për herë të parë në Paris Fashion Week, Klum mori nderin për të mbyllur një sfilatë, një rol që zakonisht u besohet modeleve më të mëdha dhe me ndikim. Pas tri dekadash karrierë, ajo vazhdon të tregojë se mbetet një forcë e pakonkurrueshme në industrinë e modës.
