E pret një javë “ferri”, Alonso vlerëson suksesin ndaj Getafe: Nuk ishte e lehtë

Nën presion pas suksesit të Barçës, Real Madrid del me 3 pikë nga sfida me Getafe duke u rikthyer në krye të La Liga në kuotën e 24 pikëve, 2 më shumë se sa ekipi blaugrana. Ekipi i Alonsos vuajti jashtëzakonisht shumë për të dalë me fitore nga kjo transfertë edhe pse kishin 77% kontrollin e topit, ndërsa vendasit e mbyllën ndeshjen me 9 lojtarë. Njeriu i ndeshjes ishte Kylian Mbappe, autor i golit të vetëm të ndeshjes.

“Gjeli” francez provoi në çdo formë gjatë pjesës së parë të gjente golin e avantazhit, por pa sukses. Në minutën e 77-të, Getafe mbeti me 10 lojtarë pas daljes me karton të kuq të Nyom, me këtë të fundit që ndërhyri në mënyrë të parregullt ndaj Vinicius jr. Më në fund, pas disa përpjekjeve, Mbappe u shkëput shpejt në minutën e 80-të dhe me një goditje të saktë dërgoi topin në rrjetë, ky ishte goli i tij i 10-të në La Liga. Vinicius nuk arriti të linte gjurmë, por kishte meritë të padiskutuar pasi 4 minuta më vonë detyroi një tjetër lojtar të Getafes të dilte me karton të kuq. Në mënyrë të pabesueshme, Getafe për pak kapi “mat” Real Madrid në frymën e fundit, ku u desh një ndërhyrje e Courtois për të mbajtur në lojë këtë fitore.

Ky sukses i jep frymëmarrje Xabi Alonsos përpara një javë shumë të ngarkuar ku fillimisht luajnë kundër Juves në Champions më pas përballen me Barçën në El Clasico: “Të fitosh në fushën e Getafes nuk është e lehtë, duhet të japësh gjithmonë maksimumin. Kjo nuk ishte ndeshja jonë më e mirë, por kjo ishte e pritshme, e dinim që nuk mund të ishim spektakolar. Kjo është një fitore që na jep mundësinë të nisim javën me energji të madhe”, u shpreh Alonso.

()

© BalkanWeb