Moti i keq në Vaun e Dejës, rreth 100 banesa përmbyten nga uji

Rreth 100 banesa raportohen me prezencë uji në Vaun e Dejës pasi reshjet e dendura të shiut shkaktuan përmbytje.

Kryebashkiaku i Vajut të Dejës, Kristian Shkreli tha për mediat se situata është e rëndë dhe se përmbytjet kanë filluar në të gjitha njësitë administrative.

Sipas tij, nga dalja e përroit të Glinës nga shtrati janë shkaktuar përmbytje, si edhe dëme të mëdha në bagëti e shpendë.

“Shpresojmë të mos rrezikohen jetët e njerëzve pasi situata është mjaft e rëndë”, tha ai.

Kristian Shkreli: Situata në Vaun e Dejës është mjaft e rëndë, përmbytjet kanë filluar në të gjitha njësitë administrative. Vau i Dejës është pak më shumë problematik pasi përroi i Glinës ka dalë nga shtrati dhe po përbën përmbytje shumë të madhe në Vaun e Dejës. Dëmet janë të mëdha, në bagëti, shpend dhe kosheret e bletëve, por shpresojmë të mos rrezikohen jetët e njerëzve pasi situata është mjaft e rëndë.

Jeni në gatishmëri për evakuim?

Kristian Shkreli: Gjithë stafi është në terren, besoj çdo gjë do shkojë mirë në evakuim, por shpresoj të mos kemi nevojë.

 Problemi kryesor është përroi i Glinës, ka 5 vite që aplikojmë për fonde dhe se kemi fituar.