“Islamikët nuk mbajnë fotografi familjare”/ Ben Blushi: Ata i kthejnë kurrizin Skënderbeut sepse e quajnë armik

Një deklaratë e bërë mbrëmë nga Ben Blushi në podcastin “Mirëmbrëma Yje” të Arbana Osmanit ka shkaktuar reagime dhe diskutime të gjera në rrjet. Gjatë bisedës, shkrimtari dhe figura e njohur e medias preku çështje fetare dhe sociale, duke dhënë opinione që u konsideruan nga shumë si provokuese.

Duke folur për raportin e tij me fenë dhe mënyrën se si ai percepton sjelljen e disa besimtarëve, Blushi u shpreh:

“Nuk e kuptoj pse njerëzit që falen gjithë ditën, dhe më akuzojnë mua që jam ateist, flasin në emër të Zotit, në emër të profetit dhe nga goja e tyre çfarë nuk del.

Sipas meje, mysliman është një njeri që pranon normat e një shoqërie civile. Një person që është katolik, ateist, nuk të dhunon që të besosh si ai, nuk dhunon gruan e tij, gocat e veta që të mbulohen. Islamikët nuk mbajnë fotografi familjare, është normë, këta janë islamikët. Kur janë te sheshi, kthejnë kurrizin Skënderbeut, sepse e quajnë armik të islamit.”

Deklarata e Ben Blushit u përhap menjëherë në rrjetet sociale, ku përdoruesit ndanë opinione të ndryshme: nga ata që e panë si një koment personal të tij, deri te ata që e kritikuan për përgjithësime ndaj komuniteteve fetare.