Përfundon hetimi, merret vendimi për aktoren turke Serenay Sarıkaya!
Një operacion i gjerë i autoriteteve turke ka tronditur botën e showbiz-it, pas një hetimi të zhvilluar në disa zona të Stambollit dhe në Muğla, ku janë shoqëruar dhe marrë në pyetje një numër figurash publike, përfshirë aktoren e njohur Serenay Sarıkaya.
Sipas burimeve zyrtare të prokurorisë së Bakırköy-it, hetimi lidhet me dyshime për “posedim dhe përdorim të lëndëve narkotike” si dhe “lehtësim të konsumit të tyre”. Në kuadër të operacionit, persona të ndryshëm nga fusha e muzikës dhe kinematografisë janë marrë në pyetje dhe janë dërguar për analiza mjeko-ligjore.
Mes të shoqëruarve ishte edhe Sarıkaya, e cila pas dëshmisë u dërgua për ekzaminime shëndetësore dhe analiza biologjike në Institutin e Mjekësisë Ligjore. Pas përfundimit të procedurave, ajo është liruar në përputhje me vendimin e autoriteteve.
Hetimi më i gjerë vjen si pjesë e një operacioni kundër rrjeteve të trafikut të drogës, ku më herët janë sekuestruar sasi të konsiderueshme lëndësh narkotike dhe janë identifikuar struktura të dyshuara për shpërndarje dhe përdorim.
Autoritetet turke bëjnë të ditur se deri tani disa persona janë liruar pas analizave, ndërsa të tjerë janë paraqitur para gjykatës me masa të ndryshme sigurie, përfshirë ndalim udhëtimi dhe detyrim paraqitjeje.
