Kelsey Grammer në pritje të fëmijës së tetë: Një tjetër bekim në moshën 70-vjeçare

Aktori i njohur amerikan, Kelsey Grammer, pritet të bëhet baba për herë të tetë. Edhe pse lajmi nuk është konfirmuar zyrtarisht nga vetë çifti, bashkëshortja e tij, Kayte Walsh, është parë së fundmi me një bark të rrumbullakosur që ka ndezur spekulimet për një shtatzëni të avancuar.

Grammer, 70 vjeç, dhe Kayte, 46, janë tashmë prindër të tre fëmijëve: Faith (12), Kelsey Gabriel (10) dhe Auden James Ellis (8). Një burim i afërt me çiftin është shprehur se kjo shtatzëni e papritur ka sjellë një frymë të re në marrëdhënien e tyre, duke i afruar edhe më shumë si bashkëshortë. “Kelsey është i emocionuar që po përjeton sërish emocionet e atësisë. Ka qenë shumë i kujdesshëm ndaj Kayte gjatë kësaj kohe dhe lindja e ardhshme ka sjellë energji të re në martesën e tyre”, thuhet nga burimi.

Përveç fëmijëve me Kayte, aktori i serialit legjendar Frasier ka edhe katër fëmijë nga lidhjet e mëparshme: Spencer (41), Greer (33), Mason Olivia (23) dhe Jude Gordon (20). Kjo do të thotë se vogëlushi që pritet të vijë në jetë do të jetë fëmija i tetë për Grammer.