Rutte qëndron pas mbështetjes për sulmet e SHBA-së ndaj Iranit: “Një veprim i jashtëzakonshëm për të eliminuar kapacitetin bërthamor”

Sekretari i Përgjithshëm i NATO-s, Mark Rutte, deklaroi se i qëndron besnik mesazhit të tij të urimit drejtuar Presidentit të SHBA-së, Donald Trump, për “veprimin e tij vendimtar në Iran”, pavarësisht raportimeve mediatike që hedhin dyshime mbi efektivitetin e sulmeve amerikane.

Në mesazhet e publikuara nga vetë Trump në rrjetin Truth Social, Rutte e cilëson sulmin e SHBA-së ndaj Iranit si “me të vërtetë të jashtëzakonshëm”.

Gjatë një deklarate për gazetarët në samitin e NATO-s që po mbahet në Holandë të mërkurën në mëngjes, Rutte u pyet nëse kishte ndryshuar mendim pas raportimeve se objektivat kryesore të programit bërthamor iranian nuk ishin shkatërruar plotësisht.

Ai u përgjigj qartë: “Jo, nuk kam ndryshuar mendim. Bombardimi i objektit bërthamor në Iran me 14 bomba të mëdha ishte thelbësor. Mendoj se ishte përpjekja maksimale për të eliminuar kapacitetin bërthamor të iranianëve, të cilin NATO ka theksuar gjithnjë se nuk duhet të lejohet t’u bjerë në dorë.”

CNN raportoi të martën se sulmet amerikane ndaj tri objekteve bërthamore në Iran nuk shkatërruan komponentët kyç të programit dhe ndoshta vetëm e kanë vonuar për disa muaj, sipas një vlerësimi të hershëm të inteligjencës, të cituar nga shtatë burime të informuara.

I pyetur nëse publikimi i mesazhit privat nga ana e Trump ishte disi i sikletshëm, ai u përgjigj prerë: “Absolutisht jo. Ajo që shkrova në atë mesazh është një fakt dhe nuk më shqetëson aspak që ai e ndau publikisht.”

Mesazhi, që Trump e postoi të hënën gjatë fluturimit drejt Europës, përmban një vlerësim të lartë për presidentin amerikan.

“Do të arrish diçka që asnjë president amerikan nuk ka arritur prej dekadash. Europa do të paguajë siç duhet, dhe kjo do të jetë fitorja jote,” shkroi Rutte, duke i uruar gjithashtu Trumpit udhëtim të mbarë drejt Holandës për samitin.

Edhe pse Presidenti Trump nuk shprehu mbështetje të qartë për Nenin 5 të Traktatit të NATO-s, i cili parashikon mbrojtjen kolektive, Rutte tha se nuk ka asnjë dyshim për angazhimin e SHBA.

“Për mua ka qartësi absolute që Shtetet e Bashkuara janë plotësisht të angazhuara ndaj NATO-s dhe Nenit 5. Po, ekziston edhe një pritshmëri që Kanadaja dhe vendet europiane të përshpejtojnë shpenzimet për mbrojtje, dhe kjo do të ndodhë sot,” u shpreh ai të mërkurën.