Rusia intensifikon ofensivën në dy fronte në Ukrainë, synon fitore territoriale përpara vjeshtës

Rusia ka shtuar ndjeshëm ofensivën ushtarake në Ukrainë, duke ushtruar presion të dyfishtë në lindje dhe juglindje të vendit, teksa përpiqet të maksimizojë përfitimet territoriale përpara se luftimeve t’u kufizohet ritmi me ardhjen e vjeshtës, raportoi agjencia AP.

Sipas analistëve dhe komandantëve ushtarakë, Moska synon të maksimizojë fitimet territoriale përpara se të marrë seriozisht në konsideratë një armëpushim të plotë.

Nga ana tjetër, Ukraina po përpiqet të ngadalësojë përparimin rus dhe t’i shkaktojë humbje të mëdha forcave pushtuese.

Forcat ruse kanë shënuar përparim të qëndrueshëm në qytetin strategjik të Pokrovskut, një nyje e rëndësishme logjistike në lindje të Ukrainës. Marrja e këtij qyteti do t’u siguronte rusëve një fitore të madhe në fushëbetejë dhe do t’i afronte ata me qëllimin për të marrë të gjithë rajonin e Donetskut.

Luftimet e intensifikuara në këtë zonë kanë çuar për herë të parë edhe në përplasje në kufirin me rajonin fqinj të Dnipropetrovskut, çka mund të sinjalizojë një zgjerim të mundshëm të fushës së betejës.

Kievi përballet me sfida të mëdha në mbrojtjen e vijave të frontit, përballë një armiku që shfaq gjithnjë e më shumë vendosmëri për të avancuar, ndërsa mbështetja ndërkombëtare për Ukrainën mbetet jetike për frenimin e agresionit rus.