Tri vite nga tërheqja, Federer bëhet zyrtarisht miliarder

Legjenda e tenisit, Roxher Federer, është futur në familjen e miliarderëve. Sipas Indeksit të Miliarderëve të “Bloomberg”, 43- vjeçari zviceran tani ka një pasuri neto të vlerësuar prej rreth 1.2 miliardë euro.

3 vite pasi u tërhoq nga tenisi profesionist, Federer theu shifrën prej një miliard euro. Gjatë karrierës së tij, ai fitoi pak më shumë se 120 milionë euro nga çmimet e kompeticioneve, ndërsa pjesa më e madhe e pasurisë së tij u fitua jashtë fushës, falë sponsorizimeve, investimeve dhe lëvizjeve të zgjuara të biznesit.

Gjatë dhe pas karrierës së tij, Federer ishte imazhi i shumë markave globale dhe zvicerane, si “Rolex”, “Lindt & Sprungli”, apo “Credit Suisse”. Federer zotëron gjithashtu aksione në kompaninë zvicerane të këpucëve sportive “On”, vlera e të cilit vlerësohet të jetë të paktën 460 milionë euro.