Alarmi i rremë për bombë i një dite më parë në Kuvendin e Kosovës, policia zbardh detajet: Kërcënimi është bërë nga një numër telefoni që mendohet të jetë nga Serbia
Një alarm i rremë për bombë në ambientet e Kuvendit të Kosovës ka çuar në evakuimin e godinës dhe në shtyrjen e seancës konstituive që ishte planifikuar për të shtunën në mëngjes. Policia e Kosovës ka njoftuar se kërcënimi dyshohet se ka ardhur nga një numër telefoni që mendohet të jetë regjistruar në Serbi.
Incidenti ndodhi përpara nisjes së seancës plenare, e cila ishte përpjekja e 42-të për zgjedhjen e kryetarit të Kuvendit. Pas raportimit të kërcënimit, objektet parlamentare u evakuuan menjëherë, ndërsa autoritetet e sigurisë ndërmorën kontrolle të imtësishme në terren.
Pas rreth tri orë e gjysmë hetimesh dhe verifikimesh të kryera nga njësitë e specializuara, Policia konfirmoi se alarmi ishte i rremë dhe se nuk kishte asnjë rrezik real për sigurinë publike.
“Bazuar në hetimet paraprake, dyshohet se kërcënimi është bërë nga një numër telefoni që mendohet të jetë nga Serbia,” thuhet në njoftimin zyrtar të Policisë së Kosovës.
Autoritetet kanë nisur hetime intensive në bashkëpunim me institucionet tjera të sigurisë, për të zbardhur identitetin e personit që qëndron pas këtij akti, si dhe për të identifikuar rrjetin e komunikimit të përdorur për të realizuar kërcënimin.
Po ashtu, organet hetimore janë në koordinim të ngushtë me partnerët ndërkombëtarë të sigurisë për të ndihmuar në gjurmimin dhe verifikimin teknik të origjinës së thirrjes.
