Trump rikthen ndihmën ushtarake për Ukrainën përmes NATO-s: Njoftim i rëndësishëm për Rusinë pritet të hënën

Presidenti amerikan Donald Trump ka njoftuar se Shtetet e Bashkuara do t’i furnizojnë Ukrainës armë përmes NATO-s, një ndryshim domethënës në qasjen e tij ndaj luftës në Ukrainë që shënon herën e parë që nga rikthimi në presidencë që ai autorizon dërgesa të reja ushtarake për Kievin.

“NATO do të paguajë 100% për armët që ne po dërgojmë. Ato do t’i transferohen Ukrainës përmes NATO-s dhe kostot do të mbulohen plotësisht nga aleatët tanë,” deklaroi Trump në një intervistë për NBC News.

Sipas dy burimeve të afërta me vendimin, ekipi i presidentit ka nisur identifikimin e pajisjeve që do të merren nga rezervat ushtarake amerikane, bazuar në autorizimin që presidenti ka për të ndihmuar aleatët në raste emergjencash. Deri tani, kostoja e kësaj pakete vlerësohet deri në 300 milionë dollarë.

Përfshirja e NATO-s si ndërmjetëse financiare është një lëvizje strategjike e Trump, që i lejon SHBA-së të ruajë distancë formale nga ndihma direkte, por gjithsesi të ndikojë në terren. Një pjesë e armëve që pritet të dërgohen përfshin raketa për sistemet Patriot dhe raketa me rreze të mesme veprimi, ndonëse lista përfundimtare ende nuk është mbyllur.

Krahas këtij njoftimi, Trump paralajmëroi një “njoftim të rëndësishëm lidhur me Rusinë” që do të bëhet të hënën, por nuk dha detaje. Lëvizja e fundit vjen pas zhgënjimit të tij me presidentin rus Vladimir Putin për mungesën e progresit në negociatat për përfundimin e luftës.

Deri tani, gjatë mandatit të dytë të Trump, ndihma ushtarake për Ukrainën ka qenë e kufizuar vetëm në pajisje të miratuara më herët nga administrata Biden. Vendimi i ri shënon një kthesë të qartë në politikat e tij të sigurisë, në një kohë kur tensionet në frontin lindor po rriten dhe Rusia vazhdon avancimin ushtarak.