“Nuk i besoj pothuajse askujt” – Presidenti Trump: Jam i zhgënjyer nga Putin, por nuk kam mbaruar me të
Presidenti amerikan Donald Trump, në një intervistë për BBC, deklaroi se është “i zhgënjyer” nga presidenti rus Vladimir Putin, por theksoi se “nuk ka mbaruar me të”.
I pyetur nëse i beson Putinit, Trump u përgjigj prerë: “Nuk i besoj pothuajse askujt.”
Deklaratat vijnë pak orë pas njoftimit zyrtar të Shtëpisë së Bardhë për dërgimin e armëve në Ukrainë dhe vendosjen e tarifave të reja ndëshkuese ndaj Rusisë, nëse nuk arrihet një marrëveshje për armëpushim brenda 50 ditësh.
I pyetur për ndikimin që atentati i dështuar ndaj tij mund të ketë pasur, Trump tha:
“Nuk më pëlqen të mendoj nëse kjo më ka ndryshuar mua… por po, mund të më ndryshojë jetën.”
Pas takimit me Sekretarin e Përgjithshëm të NATO-s, Mark Rutte, Trump u ndal më gjatë tek raportet me Moskën:
“Jam i zhgënjyer nga ai (Putini), por nuk kam mbaruar me të,” u shpreh ai, duke shtuar se po punon për ta ndalur gjakderdhjen në Ukrainë.
Në vijim të intervistës, Trump lëshoi mesazhe të qarta se linja e tij ndaj Rusisë do të jetë më e ashpër se në të kaluarën, ndërsa nuk përjashtoi rifillimin e dialogut direkt me Kremlinin nëse shihen sinjale për ulje tensionesh.
