Putin “i hapur” për takim me Zelenskyn, por me kushte: Duhet bazë serioze për negociata

Kremlini nuk përjashton mundësinë e një takimi mes presidentit rus Vladimir Putin dhe homologut ukrainas Volodymyr Zelensky, por me një kusht të qartë: duhet të ketë përgatitje serioze dhe negociata paraprake mes ekspertëve.

Zëdhënësi i Kremlinit, Dmitry Peskov, deklaroi për mediat se një samit i tillë mund të ndodhë vetëm nëse krijohet një bazë konkrete për diskutime thelbësore.

“Presidenti nuk e përjashton mundësinë e takimit me Zelenskyn, por vetëm pas përgatitjeve serioze dhe zhvillimit të negociatave nga ekspertët,” – tha Peskov, duke nënvizuar se për momentin “nuk janë bërë të gjitha përgatitjet e nevojshme”.

Kjo deklaratë vjen në një moment kur lufta në Ukrainë vijon, ndërsa presioni ndërkombëtar për një zgjidhje diplomatike është në rritje. Nga ana tjetër, Ukraina ka theksuar se nuk do të pranojë asnjë kompromis që prek sovranitetin apo integritetin territorial të saj.