Libani miraton planin amerikan për çarmatosjen e Hezbollahut brenda 2025

Qeveria e Libanit ka miratuar parimisht planin e propozuar nga Shtetet e Bashkuara për çarmatosjen e Hezbollahut deri më 31 dhjetor 2025, si dhe për tërheqjen graduale të forcave izraelite nga territori libanez. Lajmi u konfirmua nga ministri i Informacionit, Paul Morcos, pas një mbledhjeje të kabinetit.

Plani, i hartuar nga i dërguari amerikan Tom Barrack, përfshin katër faza që parashikojnë ndër të tjera:

• çarmatimin e menjëhershëm të Hezbollahut;

• shtrirjen e kontrollit shtetëror mbi të gjitha armët;

• tërheqjen e Izraelit nga pesë pozicione në jug të Libanit;

• zgjidhjen e statusit të kufijve me Izraelin dhe Sirinë;

• dhe organizimin e një konference ndërkombëtare për rindërtimin e Libanit.

Vendimi shkaktoi përplasje politike: përfaqësuesit e Hezbollahut dhe aleatët shiitë e braktisën mbledhjen në shenjë proteste.

Faza e fundit e planit përfshin çmontimin e raketave dhe dronëve të Hezbollahut, ndërsa shtetet sponsore – SHBA, Arabia Saudite, Franca dhe Katari – do të garantojnë mbështetjen ekonomike të Libanit.

As Hezbollah dhe as Izraeli nuk kanë reaguar zyrtarisht deri tani, ndërsa tensionet në rajon mbeten të larta.