Presidenti kinez: Pekini e mirëpret afrimin Rusi–SHBA, dialogu çelësi për krizën në Ukrainë

Presidenti kinez Xi Jinping, në një bisedë telefonike me Vladimir Putinin, deklaroi se Pekini e mirëpret përmirësimin e marrëdhënieve mes Rusisë dhe Shteteve të Bashkuara, si dhe përpjekjet për të gjetur një zgjidhje politike për krizën në Ukrainë.

“Kina është e lumtur që sheh Rusinë dhe SHBA-në të mbajnë kontakte, të përmirësojnë marrëdhëniet dhe të punojnë për një zgjidhje politike të krizës ukrainase,” – u shpreh Xi, sipas agjencisë Xinhua.

Ai shtoi se çështjet komplekse nuk kanë përgjigje të thjeshta dhe se Kina do të mbështesë gjithmonë paqen dhe dialogun.

Deklaratat e tij vijnë teksa Donald Trump dhe Vladimir Putin po përgatiten për një takim të mundshëm javën e ardhshme, ndonëse data dhe vendndodhja ende nuk janë përcaktuar.

Kina ka mbajtur një qëndrim publikisht të balancuar për luftën në Ukrainë, duke shmangur kritikën e drejtpërdrejtë ndaj Rusisë, por duke theksuar rëndësinë e diplomacisë – ndërkohë që Perëndimi e akuzon për mbështetje të heshtur ndaj Moskës, veçanërisht në fushën ekonomike dhe teknologjike.