Zjarr masiv “Canyon Fire” në Los Anxhelos! Mbi 2.700 banorë evakuohen, flakët përhapen me shpejtësi
Një zjarr i fuqishëm pyjor, i quajtur “Canyon Fire”, ka përfshirë veriperëndimin e Los Anxhelosit, duke detyruar evakuimin e mbi 2.700 banorëve dhe vënien në gatishmëri të 14.000 të tjerëve. Flakët, të nxitura nga temperaturat ekstreme dhe thatësira, janë përhapur nga 30 hektarë në gati 5.000 hektarë brenda pak orësh.
Shërbimi i Zjarrfikësve të Qarkut Ventura bën me dije se 25% e zjarrit është vënë nën kontroll, ndërsa qyteti Santa Clarita dhe zonat përreth janë në alarm të lartë. Autoritetet u kanë bërë thirrje banorëve të respektojnë menjëherë urdhrat për evakuim.
“Nëse ndodheni në Santa Clarita, Hasley Canyon apo Val Verde, merrni seriozisht çdo urdhër për evakuim. Mos rrezikoni jetën tuaj,” paralajmëroi inspektorja e qarkut Los Anxhelos, Kathryn Barger.
Deri mbrëmjen e së enjtes nuk janë raportuar dëme në banesa apo persona të lënduar. Megjithatë, temperaturat pritet të arrijnë deri në 37.7°C, duke e vështirësuar ndjeshëm shuarjen e flakëve.
“Canyon Fire” është vetëm një nga disa zjarret aktive në Kaliforni. Më i madhi, “Gifford”, ka shkrumbuar afro 100.000 hektarë në qarqet San Luis Obispo dhe Santa Barbara. Ekspertët paralajmërojnë se ndryshimet klimatike po i bëjnë këto zjarre gjithnjë e më të shpeshta dhe më të fuqishme.
