Përballë realitetit politik, një aksion i fortë opozitar

NGA EKREM SPAHIU

Po lëmë pas një stinë shumë të nxehtë nga temperaturat e verës dhe të politikes dhe gjasat janë që në shtator “zjarret” të zhvendosen nga pyjet te politika. Gjatë këtyre 3-4 ditëve të fundit kemi dy zhvillime pozitive që lidhen me zgjedhjet e 11 majit 2025 në Shqipëri dhe zgjedhjet e 9 shkurtit 2025 në Kosovë. Komisioni Qendror i Zgjedhjeve në Tiranë, më në fund, pas më shumë se 3 muaj e gjysmë (109 ditë) nëpërmjet Komisionit Rregullator, ka certifikuar tashmë rezultatin përfundimtar të zgjedhjeve parlamentare të 11 majit 2025.

Tashmë është e ditur se, këto zgjedhje janë kontestuar nga i gjithë faktori opozitar dhe nuk i njohin ato, ndërkohë që vëzhguesit e OSBE/ODIHR-it kanë shprehur në Raportin paraprak problematika të mëdha për zgjedhjet. Të gjithë, me sy e veshë janë te Partia Demokratike si partia kryesore e opozitës, duke pritur se çfarë do të bëjë në shtator e në vazhdim. Përballë këtij realiteti politik, por edhe për zgjedhjet e pjesshme në Bashkinë e Tiranës dhe në tri të tjera, “Lëvizja për Zhvillim Kombëtar” rikonfirmon qëndrimin e saj se është domosdoshmëri kombëtare bashkëpunimi politik në një front të përbashkët i të gjithë faktorëve dhe aktorëve opozitarë, duke përdorur të gjitha mjetet dhe mënyrat demokratike për të rikthyer besimin e shqiptarëve te demokracia dhe fitorja nëpërmjet votës së lirë.

Mendojmë se aksioni radikal opozitar duhet të jetë, krijimi i një qeverie kalimtare me mandat të kufizuar për të realizuar:

-Ndryshimet kushtetuese

-Rishikimin e reformës territoriale

-Reformën zgjedhore

-Zgjedhjet e parakohshme

* * *

“Lëvizja për Zhvillim Kombëtar”, çështjen kombëtare e ka në ADN e programit të saj dhe në këtë kontekst i ndjekim me shumë vëmendje zhvillimet në Kosovë. Deputetët e Kosovës, dalë nga zgjedhjet e 9 shkurt 2025 pas një procedure të zgjatur, në përpjekjen e 58-të të tyre, më 26 gusht votuan kryetarin e Kuvendit të Kosovës. Me këtë rast “Lëvizja për Zhvillim Kombëtar” i uron kryetarit të zgjedhur, zotni Dimal Basha, suksese në detyrë dhe Kuvendit të Kosovës punë të mbarë!

Pikërisht në këtë datë, më 26 gusht, Presidenti i Serbisë, Aleksandar Vuçiq, njoftoi se ka zhvilluar një bisedë telefonike me ministrin e Jashtëm të Rusisë, Sergey Lavrov, për thellimin e mëtejmë të bashkëpunimit mes dy vendeve dhe për situatën politike në rajon. Vuçiq tha se e ka njoftuar shefin e diplomacisë ruse për situatën në Kosovë për: “… përpjekjet e vazhdueshme për dëbimin e popullsisë sonë nga vatrat shekullore, si dhe për heshtjen e shumicës së bashkësisë ndërkombëtare”.

“Lëvizja për Zhvillim Kombëtar” shpreh mendimin e saj se, me gjeopolitikën e trazuar në rajon e më gjerë do të ishte mirë që sa më shpejt të votohet edhe Qeveria e re e Kosovës, me bazë të një koalicioni sa më të gjerë, për të përballuar së bashku të gjithë sfidat e reja, por edhe për të shpejtuar proceset zhvillimore dhe integruese të Kosovës në dobi të qytetarëve dhe në përputhje me aspiratat euroatlantike të vendit.

/Gazeta Panorama