Piastri-Norris, beteja e titullit zhvendoset në Baku

Pas një jave pushimi, Formula 1 zbarkon në rrugët e Bakut për Çmimin e Madh të Azerbajxhanit, një nga garat më të pritura të sezonit. Lando Norris dhe Oskar Piastri janë gati të shkruajnë një kapitull të ri në betejën për titull, pas një fundjave shumë të diskutuar në GP-në e Italisë, ku britaniku përfitoi nga vendimet strategjike të ekipit për të kaluar vijën e finishit përpara shokut të skuadrës.

Janë vetëm 31 pikë që i ndajnë dy pilotët e MekLarenit në renditje, me vetëm tetë gara të mbetura deri në fund të kampionatit. Gara e radhës zhvillohet në një pistë që favorizon liderin aktual të klasifikimit. Vetëm 12 muaj më parë, Piastri fitoi këtu duke nisur nga pozicioni i dytë, një fitore vendimtare që ndihmoi MekLarenin të siguronte titullin e konstruktorëve për herë të parë pas 25 vitesh.

ÇDO PIKË VLEN – Gjatë konferencës për shtyp këtë fundjavë, Piastri nuk e fshehu kënaqësinë për rikthimin në Baku: “Kam kujtime shumë të mira nga viti i kaluar”, u shpreh australiani. “E konsideroj një nga garat e mia të preferuara dhe është gjithmonë një avantazh kur rikthehesh në një pistë ku ke pasur rezultate të mira”. Piastri pranoi se objektivi i tij është të fitojë sërish në kryeqytetin e Azerbajxhanit, një rezultat që do ta afronte edhe më shumë me titullin e pilotëve.

“Objektivi im i vetëm është të arrij të njëjtin rezultat këtë fundjavë. Jam lider në kampionatin e pilotëve dhe jam shumë i kënaqur me mënyrën se si po pilotoj”, u shpreh 24-vjeçari. Nga ana tjetër, Lando Norris, i cili sapo është kthyer nga një udhëtim në Misano për garën e MotoGP-së, kërkon të vazhdojë të ngushtojë diferencën me shokun e skuadrës. “Jam i emocionuar që rikthehem në garë këtë fundjavë në Baku”, deklaroi britaniku. “Pistat urbane paraqesin sfida të ndryshme dhe mezi pres të zbres në pistë dhe të testoj veten. Jam rikthyer në MTC (Qendra Teknologjike MekLaren) dhe po punoj fort për të qenë në formën më të mirë të mundshme për të kërkuar një tjetër fitore”.

RISIA ME GOMAT – Çmimi i Madh i Azerbajxhanit do të ketë një veçori të rrallë që nuk është parë që nga gara në Kanada. “Pirelli” do të sjellë, për herë të katërt këtë sezon, përbërjen më të butë të gomave, C6. Pas garave në Imola, Monako dhe Montreal, kjo përbërje do të jetë sërish në dispozicion të ekipeve dhe pilotëve, së bashku me C5 dhe C4. Në garën e kaluar, shumica e pilotëve përdorën një strategji me vetëm një ndalesë, një skenar që mund të përsëritet edhe këtë fundjavë në Baku, njësoj si vitin e kaluar, përveç rasteve të jashtëzakonshme kur ndërrimi i gomave ndodhi për shkak të shpimeve ose incidenteve të tjera të jashtme.

© BalkanWeb