Festa e 7 marsit, Spiropali uron mësuesit: Nuk janë thjeshtë profesionistë, por dhe misionarë që motivojnë e frymëzojnë

Kryetarja e Kuvendit, Elisa Spiropali, ka uruar mësuesit festën e 7 Marsit, duke u shprehur se ata nuk janë thjesht profesonistë, por dhe misionarë.

Në urim, i postuar në rrjete sociale, Spiropali shkruan se “të mësuarit është çelësi më i rëndësishëm për progresin, mirëqenien dhe zhvillimin. Prandaj nëse dëshirojmë t’u japim shumë shanse fëmijëve tanë, t’u japim më parë një shans mësuesve të Shqipërisë.”

Postimi i plotë:

Sot është 7 Marsi, Dita e Mësuesit, profesionit që formëson të gjitha profesionet e tjera.

Thënia e Konfucit “Vlera e mësuesit dhe pesha e qiellit janë të pamatshme”, është një mësim universal për të gjitha kohërat.

Pas çdo historie suksesi, ka pasur një mësues që ka ndezur kureshtjen, ka nxitur ambicjen dhe ka forcuar besimin.

Mësuesit nuk janë thjesht profesionistë, por misionarë, të cilët, mbi të gjitha, motivojnë e frymëzojnë.

Sepse të mësuarit është çelësi më i rëndësishëm për progresin, mirëqenien dhe zhvillimin.

Prandaj nëse dëshirojmë t’u japim shumë shanse fëmijëve tanë, t’u japim më parë një shans mësuesve të Shqipërisë.

Atyre që punojnë jo për t’u pasuruar, por për të ndërtuar jetët e fëmijëve tanë, që frymëzojnë me modelin dhe shembullin e tyre.

Prandaj ne nuk kursehemi, dhe nuk do të kursehemi, të rrisim, siç edhe kemi rritur, pagat e mësuesve.

Të përmirësojmë, siç edhe kemi përmirësuar, kushtet në shkollat në çdo qytet e fshat të vendit.

Të vazhdojmë të rrisim investimet për arsimin, shkollimin, edukimin qytetar dhe formimin shkencor.

Mësuesit e kthejnë këtë investim me përkushtimin, talentin dhe dashurinë e tyre për vajzat dhe djemtë e Shqipërisë.

Gëzuar 7 Marsin, mësuese dhe mësues, të dashur, të urtë e të respektuar!

Mirënjohje pa fund për ju, mësues të së kaluarës, mësues të sotëm dhe të ardhshëm të Shqipërisë!