VIDEO/ Dramë në Torino, Fiore nxjerr Juven nga Champions, Spalletti: Ndeshje e shëmtuar, do flas me Elkann

Juve bën “harakiri” brenda në Torino, pëson një humbje shokuese 2-0 përballë Fiorentinës duke “minuar” të gjithë sezonin. Pas kësaj disfate, “Zonja e Vjetër” e sheh veten jashtë Champions League një javë përpara fundit. Tani ekipit të Spallettit i duhet një mrekulli pasi fati i këtij objektivi nuk është më në dorën e tyre, i duhet që Roma e Milan të humbasin ndeshjet e tyre respektive, por të mos fitojë as Como, në letër është thjesht një mision i pamundur.

Për Juven gjithçka nisi keq në këtë sfidë ku në minutën e 34-ët Ndour kaloi Fioren në avantazh. Në fraksionin e dytë, Spalletti hodhi në fushë dyshen Zhegrova-Thuram dhe një minutë më vonë, ishte Dusan Vlahovic që gjeti golin e barazimit, por VAR anuloi gjithçka për pozicion jashtë loje. Juve jo vetëm ishte e pafuqishme për t’u rikthyer në lojë, por në minutën e 83-të, Mandragora me një gol spektakolar vulosi disfatën e Juves, e të mendosh që ekipi vjollcë nuk kishte asnjë objektiv në këtë transfertë pasi e kishin siguruar prej kohësh mbijetesën në Serie A. Një javë përpara fundit, Juve e sheh veten në vendin e 6-të në kuotën e 68-të pikëve, të paktën nuk rrezikojnë Europa League.

Pas ndeshjes, dukshëm Luciano Spalletti ishte i tronditur, teksa pohoi se do të ulet në një tavolinë me John Elkann për të analizuar sezonin: “Ishte një rezultat i shëmtuar, por nuk është çështje jetë e vdekje, është thjesht një ndeshje futbolli të cilën e luajtëm shumë keq, por dhe disa episode nuk ishin në favorin tonë. Javën e ardhshme do të ulem në një tavolinë me Elkann, më duhet të prezantoj diçka më shumë se sa prezantuam kundër Fiorentinës. E di që pa Champions shoqëria humbet shumë para, por në këndvështrimin tim ky ka qenë një sezon pozitiv”, u shpreh Spalletti.