Sipas SPAK, Belinda Balluku fshehu në emër të Igli Tares një vilë në Dhërmi të përfituar si ryshfet
Prokuroria e Posaçme, SPAK njoftoi të enjten më 4 qershor se ish-zv.kryeministrja Belinda Balluku dyshohet se ka kryer korrupsion pasiv e pastrim parash, përveç veprave penale të shkeljes së barazisë në tendera për të cilat është marrë e pandehur në tetor të vitit të kaluar. Po ashtu, është sekuestruar një vilë luksoze në Dhërmi, që dyshohet se është përfituar si ryshfet prej saj, në këmbim të favoreve që i janë bërë shoqërisë ndërtuese “Eurocol” sh.p.k., në procedurën e një tenderi dhe gjatë zbatimit të kontratës. Për zotërimin e vilës janë kryer veprime fiktive, në të cilat është përfshirë Igli Tare, ish-futbollisti i famshëm i Kombëtares Shqiptare dhe ish-drejtor i Lazios e Milanit në Itali.
Më 3 qershor, Gjykata e Posaçme e Shkallës së Parë ka pranuar kërkesën e SPAK për sekuestrimin e vilës dykatëshe në resortin turistik “White Rocks”, Gjilekë, Dhërmi, Bashkia Himarë, pasuri që rezulton në pronësi indirekte të ish-zv.kryeministres Belinda Balluku. “Ekzistojnë dyshime se pasuria e sekuestruar lidhet me përfitimin e parregullt, të kërkuar dhe marrë nga shtetasja Belinda Balluku, në këmbim të favorizimit të operatorit ekonomik, përmes një procedure prokurimi publik të zhvilluar nga Albcontrol sh.a. Hetimet kanë evidentuar gjithashtu përdorimin e veprimeve juridike të dyshuara si fiktive, me qëllim fshehjen e origjinës dhe pronësisë reale të pasurisë”, citohet në njoftim.
Po ashtu, sqarohet se pasuria e sekuestruar është një vilë individuale dykatëshe tip Begonia me nr. F6 dhe e rrethuar. Parcela në dispozicion të vilës është jo më pak se 300 m², ndërkohë që kati i parë i objektit ndërtimor ka sipërfaqe prej 103 m², nga të cilat 54 m² kati përdhe, ai sipër 49 m² dhe veranda 34 m². Brenda rrethimit ndodhet edhe vendparkimi.
Sipas SPAK, Balluku ka kryer veprime të kundërligjshme në lidhje me procedurën e prokurimit me objekt “Rikonstruksioni i godinës teknologjike të Albcontrol për përmirësimin e kushteve”, me fond limit 88.6 milionë lekë, si dhe në tenderin “Shtesë kontrate për ‘Rikonstruksionin e godinës teknologjike të Albcontrol për përmirësimin e kushteve’”, me vlerë 14.1 milionë lekë, pa TVSH.
Nga hetimet ka rezultuar se e pandehura Belinda Balluku, në cilësinë e titullares së autoritetit kontraktor “Albcontrol” sh.a., në bashkëpunim me shtetasin Evis Berberi që atëherë ka pasur detyrën e shefit të Sektorit të Prokurimeve, si dhe anëtarët e njësisë së prokurimit, shtetasit S.P., E.N. dhe A.M., përmes veprimeve të kundërligjshme kanë paracaktuar dhe krijuar avantazhe e privilegje të padrejta për shoqërinë fituese të procedurës së prokurimit, operatorin ekonomik “Eurocol” sh.p.k., e zotëruar nga biznesmeni Pandeli Carapuli.
Po ashtu, favorizimi i kësaj shoqërie që është shpallur fituese, ka vazhduar edhe në momentin e lidhjes së kontratës, duke i ofruar parapagim të menjëhershëm gjysmën e vlerës së kontratës, si dhe gjatë zbatimit të kontratës dhe shtesës së saj.
“Nga hetimi rezulton se shtetasja Belinda Balluku, për shkak të funksionit të saj publik si Drejtore e Përgjithshme e Albcontrol sh.a., në këmbim të favorizimit të shoqërisë ‘Eurocol’ sh.p.k. në procedurën e sipërcituar, ka kërkuar dhe marrë përfitim të parregullt, i cili, referuar kontratës së porosisë, është në vlerën 145,000 (njëqind e dyzet e pesë mijë) euro, që konsiston në pasuri të paluajtshme, konkretisht vilën me nr. F6, në resortin turistik ‘White Rocks’, Gjilekë, Dhërmi, Bashkia Himarë, Qarku Vlorë, me zhvillues shoqërinë ‘Eurocol’ sh.p.k.”, bën me dije SPAK.
Përfitimi i parregullt ka rezultuar se është kërkuar gjatë kohës së zhvillimit të tenderit, ku rezulton se në atë kohë shoqëria “Eurocol” sh.p.k. kishte aplikuar dhe ishte pajisur me lejen zhvillimore për ndërtimin e resortit turistik në fshatin Gjilekë.
Përveç përfitimit të parregullt, Balluku akuzohet se e ka fshehur këtë pasuri duke përdorur shtetasin Igli Tare dhe vartësen e saj në Albcontrol sh.a., shtetasen J.B. Sipas prokurorisë, kontrata e porosisë është kryer në mënyrë fiktive mes të hetuarit Igli Tare dhe pronarit të shoqërisë “Eurocol”. Balluku akuzohet se ka kryer fiktivisht edhe një kontratë qiraje dore mes saj, vartëses dhe Tares, në maj të vitit 2022, si dhe amendamentin e kësaj kontrate në prill të vitit 2024.
Igli Tare u mor në pyetje në SPAK prej mëngjesit të së enjtes, kur prej rreth orës 10:00 dhe deri në orën 14:40 ai ka qenë edhe nën shoqërinë e avokatit të tij, për shkak të komunikimit të regjistrimit të emrit si person nën hetim, për pastrim të produkteve të veprës penale.
Balluku është nën akuzë për shkelje të barazisë në tendera lidhur me procedurën e prokurimit për ndërtimin e tunelit të Llogarasë në seksionin rrugor Orikum-Himarë dhe në shtatë raste të procedurave të prokurimit të ndërtimit të Unazës së Jashtme të Tiranës.
Mazhoranca socialiste në Kuvend e rrëzoi në muajin mars një kërkesë të SPAK për lejimin e arrestimit të saj.
