Diddy mes lotëve dhe akuzave: “Thuaji se po mendoj për të”

Sean “Diddy” Combs u drejtua me emocion audiencës në sallën e gjyqit pasi seanca e radhës përfundoi, duke thënë: “Ju dua të gjithëve,” dhe më pas, më me zë të ulët shtoi: “Po… dashuri.” Ai u kthye nga një grua që ndodhej në galeri dhe i tha: “Të lutem, thuaji Justin se po mendoj për të” – duke iu referuar dukshëm djalit të tij 31-vjeçar, Justin Combs. Përpara se të largohej nga salla, vendosi dorën mbi zemër.

Më herët gjatë seancës, dëshmoi agjenti special i Sigurisë Kombëtare, Gerard Gannon, lidhur me kontrollin e kryer më 25 mars 2024 në banesën e Diddy-t në Miami.

Sipas Gannon, bastisja u zhvillua si pjesë e një hetimi për trafikim njerëzor. Ai sqaroi se, për shkak të përmasave të pronës – rreth 20 mijë metra katrorë, përfshirë dhe një shtëpi për miq – në aksion morën pjesë rreth 80 deri në 90 agjentë.

Në dollapin e dhomës së gjumit kryesor, agjentët gjetën këpucë me taka të larta, lodra seksuale, lubrifikantë, të brendshme femrash dhe pjesë armësh zjarri. Midis tyre, u zbuluan përbërës të tipit AR-15 – pjesë të sipërme dhe të poshtme të armës – disa prej të cilave me numrat serialë të gërryer.

Gannon theksoi se “është shumë më e vështirë, në mos e pamundur” të identifikohet pronari i një arme pa numër serial. Ai shtoi gjithashtu se armët kishin veçori të pazakonta, përfshirë ndërrues për zjarr automatik, por ishin vendosur në modalitetin gjysmë-automatik.

Gjatë dëshmisë së tij, fotografi të provave dhe pjesëve të armëve u treguan jurisë.

Diddy, i veshur me një pulovër blu dhe një këmishë të bardhë që i mbulonte tatuazhin në qafë, shihej herë pas here duke tundur kokën, në dukje i shqetësuar nga ato që po dëgjonte.