Zgjedhjet parlamentare 2025/ Komisioni Rregullator miraton numrin e mandateve, ja ndarja e ligjvënësve për çdo qark
Komisioni Rregullator ka miratuar numrin e mandateve për çdo qark si dhe ngritjen e zonave të administrimit zgjedhor, lidhur me zgjedhjet parlamentarë të 11 majit 2025.
Komisioni vendosi që të ngrihen 93 zona administrimi zgjedhor.
Sipas njoftimit të KQZ-së, bashkitë me më shumë se 80 mijë banorë ndahen në më shumë se një ZAZ.
Sakaq, qarkut të Tiranës do t’i shtohet 1 mandat, duke kaluar në 37 mandate, ndërsa Korçës do i hiqet një, duke kaluar në 10 mandate.
Qarku i Fierit do të ketë 16 mandate.
Qarqet Durrës, Elbasan, do të kenë 14 mandate.
Qarku i Vlorës do të ketë 12 mandate, ndërsa i Shkodrës 11.
Sakaq, qarku i Lezhës do të ketë 7 mandate, i Gjirokastrës 4 ndërsa i Kukësit 3 mandate.
Njoftimi i KQZ-së:
Tiranë më 05.12.2024
Zgjedhjet 2025 – KRr miraton numrin e mandateve për çdo qark dhe ngritjen e zonave të administrimit zgjedhor
Sot, Komisioni Rregullator shqyrtoi projektvendimin “Për caktimin e kufijve dhe ngritjen e zonave të administrimit zgjedhor, për Zgjedhjet për Kuvend të vitit 2025”.
Komisioni caktoi kufijtë dhe ngritjen e 93 (nëntëdhjetë e tre) Zonave të Administrimit Zgjedhor për Zgjedhjet për Kuvend, që do të mbahen në datën 11 Maj 2025.
Bashkitë që kanë më shumë se 80 mijë shtetas me të drejtë vote ndahen nga KQZ-ja në më shumë se sa një ZAZ, duke respektuar kriterin e pandashmërisë së territorit të njësisë administrative, vazhdimësinë dhe kompaktësinë e territorit, barrierat gjeografike, mundësitë e mira të komunikimit brenda territorit dhe numër të përafërt zgjedhësish.
Gjithashtu, u shqyrtua edhe projektvendimi “Për miratimin e numrit të mandateve për çdo zonë zgjedhore, për Zgjedhjet për Kuvend të vitit 2025”.
Komisioni Rregullator miratoi numrin e mandateve për 12 qarqet e vendit, si më poshtë vijon:
1. Qarku Berat 7 mandate
2. Qarku Dibër 5 mandate
3. Qarku Durrës 14 mandate
4. Qarku Elbasan 14 mandate
5. Qarku Fier 16 mandate
6. Qarku Gjirokastër 4 mandate
7. Qarku Korçë 10 mandate
8. Qarku Kukës 3 mandate
9. Qarku Lezhë 7 mandate
10. Qarku Shkodër 11 mandate
11. Qarku Tiranë 37 mandate
12. Qarku Vlorë 12 mandate
Komisioni Rregullator vendosi shtyrjen e shqyrtimit të projektvendimit “Mbi rregullat për numërimin dhe vlerësimin e votave nga jashtë, dokumentacionin përkatës dhe mënyrën e plotësimit të tij, si dhe tabelimin e rezultatit të votimit nga jashtë”.
