Trajneri i Liverpool para PSG: Luajmë ndaj një prej skuadrave më të forta në Evropë, besoj te ekipi

Trajneri i Liverpool, Arne Slot doli në konferencë para ndeshjes ndaj PSG në Champions.

“Luis Enrique ka bërë shumë gjëra të mëdha në Paris, njëra prej të cilave është përmirësimi i paraqitjeve individuale. Të dyja skuadrat kanë sulmues në formë të shkëlqyer. Mendoj se kjo skuadër parisiene është edhe më e mirë se ajo që arriti në gjysmëfinale sezonin e kaluar”.

“Paris është një nga skuadrat më të forta në Evropë, siç mund ta shihni nga mënyra se si ata kanë luajtur në muajt e fundit. Është një ndeshje e mrekullueshme që nuk duhet humbur për këdo që e do futbollin. Të dy kemi shënuar shumë gola këtë sezon dhe luajmë në të njëjtën mënyrë, kështu që do të jetë interesante”.

“Është një kompliment i bukur që ne jemi skuadra më e mirë në Evropë, por skuadra më e mirë në Evropë duhet të fitojë Ligën e Kampionëve dhe ne jemi ende shumë larg nga kjo. Skuadra më e mirë në Evropë për momentin është Real Madrid, i cili e fitoi herën e fundit”.